Poslovne vijesti - Makedonija

Ќе паѓаат каматите и ќе поевтинуваат кредитите

Кредитната линија од 480 милиони евра од Меѓународниот монетарен фонд (ММФ) ќе влијае врз долгоочекуваното намалување на каматни стапки.

Како што вчера изјави вицепремиерот и министер за финансии, Зоран Ставрески, идната година се очекува зголемување на кредитната активноста на банките и намалување на каматите, а основа за тоа е новата кредитна линија од ММФ и заживувањето и стабилизирањето на македонската економија.

- Сметам дека со чекорите што се презедоа во 2010, а тоа со координирано и синхронизирано намалување на каматните стапки и на Централната банка и на државните записи, како и со одржување на строга фискална дисциплина, се помогна да се креираат очекувања кои кај банките ќе овозможат да се зголеми кредитната активност и да се намалат активните каматни стапки - изјави Ставрески.

Тој очекува дека овие нови моменти - кредитната линија и стабилизацијата на економската активност, банките да ги земат предвид во своите анализи и тоа да доведе до намалување на каматните стапки.

- Банките ќе имаат постабилни услови за кредитирање и повеќе расположливи средства, така што не гледам причина, се разбира за здрави, профитабилни проекти да не се зголемува кредитната активност и се очекува таа да изнесува 10 до 15 проценти - додаде Ставрески.

На банките ќе им останат повеќе слободни средства за зголемување на кредитната активност и со евентуалното издавање на еврообврзницата. Годинава кредитната активност на банките изнесува девет проценти. Според Народната банка, кредитирањето се зголемува, но со бавно темпо. Во третиот квартал е за близу 2 отсто поголемо во однос на вториот квартал и во моментот нешто помалку од 3 милијарди евра се пласирани во кредити.

Иако Централна банка годинава седум пати ја намали референтата камата, деловните банки не ја следеа таа политика со позначително поевтинување на кредитите.

- Каматите паѓаат, иако со побавно темпо од тоа што го очекуваат клиентите - коментира директорот на НЛБ Тутунска банка и претседател на Здружението на банкарство при Стопанската комора на Македонија, Ѓорѓи Јанчевски. Според него, каматните стапки исто така зависат и од бонитетот на клиентите и од видот на обезбедувањето.